Втор ден по ред се одвива генералниот штрајк на вработените во јавниот сектор кои бараат линеарно зголемување на платите за 2.806 денари и враќање на правото за регрес на годишен одмор.
„Денеска протестираме пред Владата да побараме поддршка од 21 министер за предлогот на ССМ за линеарно зголемување на платоте за 2806 денари, но за жал не не пречекаа како за 1-Ви Мај. Тогаш кажаа дека за сите ќе има линеарно зголемување на платите со ребалансот на Буџетот, но денеска ги нема. Затоа јавно апелирам и кажувам работникот си дојде по ветеното, работникот си дојде по своето бидејќи ние немаме друг начин како да издржиме во оваа економска криза. Немаме друг начин како да ја издржиме инфалцијата. Затоа ја повикувам целата Влада на чело со премиерот да го решиме проблемот што поскоро, сакаат преку амандман во Собранието, сакаат со Општиот колективен договор во јавниот сектор, изјави претседателот на Сојузот на синдикатите на Македонија (ССМ) Дарко Димовски.
Тој информира дека се штрајкува низ цела држава и на сите работни места. Димовски најави дека утре ќе протестираат пред Министерството за финансии.
Штрајкот се одвива секој ден од 10 до 11 часот, така што вработените во јавниот сектор во тој период ќе го прекинат работниот процес и ќе излезат надвор, а само десет проценти од нив ќе работат онаму каде што е потребно за итни случаи.