Во Маракеш денеска ќе се одржи министерски состанок на земјите-членки на коалицијата против џихадистите на Исламската држава, на кој ќе учествува и шефот на американската дипломатија Ентони Блинкен. САД во понеделникот воведоа санкции за, како што е наведено, мрежа од пет финансиски олеснувачи на Исламската држава кои работат низ Индонезија, Сирија и Турција како поддршка на членовите на екстремистичката џихадистичка група во Сирија. Американското Министерство за финансии во соопштение ги обвини назначените дека имаат клучна улога во олеснувањето на патувањето на екстремистите во Сирија и другите области каде што дејствува Исламска држава, како и за спроведување финансиски трансфери за поддршка на напорите на групата во камповите за раселени лица со седиште во Сирија.
Исламската држава повикува на нови напади во Европа
Министерството за финансии соопшти дека мрежата собира средства во Индонезија и Турција, „од кои некои беа искористени за плаќање за шверцување деца надвор од камповите и нивно доставување до странските борци на ИД како потенцијални регрути“. „Соединетите Држави, како дел од Глобалната коалиција против Исламската држава, се посветени на негирање на можноста таа да собира и пренесува средства низ повеќе јурисдикции“, рече во изјавата Брајан Нелсон, потсекретар за тероризам и финансиско разузнавање на Министерството за финансии.