Европската перспектива на Република Северна Македонија нема алтернатива и е стратешка цел на Бугарија, изјави претседателот на Бугарија Румен Радев. Сепак, тој истакна дека нејзината интеграција не може да се случи без претходно да се гарантираат правата на Бугарите во Северна Македонија и да се запре говорот на омраза, јави дописникот на МИА од Софија.
Радев се обрати на отворањето на конференцијата „Европска перспектива за добрососедски односи меѓу Република Бугарија и Република Северна Македонија“. Конференцијата се одржува на денот кога се одбележуваат 119 години од смртта на Гоце Делчев.
- 119 години од смртта на Гоце Делчев
- Радев: Бугарија очекува Северна Македонија да ги почитува правата на своите граѓани
Радев, исто така, посочува дека Бугарија сака да ги реши спорните политички прашања со Северна Македонија пред почетокот на преговорите за членство во ЕУ, бидејќи во последните децении има многу случаи во односите во кои бугарската доверба не била оправдана од Северна Македонија.
„Промената на Уставот на Северна Македонија и внесувањето на еден збор – Бугари, заедно со другите државотворни народи, во земјата значи дека ја прифаќа европската идеја“, изјави Радев.
Тој, исто така, запраша каква ќе биде волјата на властите да ги исполнат критериумите од Копенхаген за членство во ЕУ, ако сега не можат да обезбедат 2/3 мнозинство во парламентот за да ја направат промената во Уставот. Според бугарскиот претседател Радев, нерешавањето на политичките прашања меѓу двете соседни земји ја блокира и размената во сите други области.