Министерот за надворешни работи Бујар Османи утре ќе отпатува во работна посета на Германија, во чии рамки ќе се сретне со државната министерка надлежна за Европа, Ана Лирман.
Исто така е најавена и негова средба со Михаил Рот, претседател на Комисијата за надворешни работи, и со Антон Хофрајтер, претседател на Комисијата за ЕУ прашања.
Покрај тоа, во агендата се предвидени средби и со советниците на германскиот Канцелар Олаф Шолц – Јенс Плотнер, за надворешна политика, и Ундине Руге, за ЕУ прашања.
Како што соопштија од Министерството за надворешни работи, целта на посетата е да се реафирмира германската позиција во однос на нашето европско досие и поддршката во однос на итната потреба од деблокирање на пристапниот процес со ЕУ.
Патот на Македонија кон ЕУ последно е блокиран пред околу две години, со бугарското вето. Бугарија тврди дека земјава ја краде бугарската историја и дека македонскиот јазик е дијалект на бугарскиот, а меѓу барањата е и ставање на Бугарите во македонскиот Устав.
Претходно проблем беше името во спорот со Грција, но тој беше надминат со договорот во Преспа, со што земјава доби име Република Северна Македонија.