Министерот за надворешни работи на Русија, Сергеј Лавров, денеска изјави дека Москва го акредитирала првиот дипломат на Авганистан предводен од талибанците.
Русија ја означи милитантната група како „терористичка организација“, а поголемиот дел од светот избегнува да ги призна новите владетели на Авганистан.
Говорејќи на собирот на министрите за надворешни работи на државите од соседството на Авганистан, Лавров денеска рече дека дипломатот на талибанската влада бил акредитиран од Министерството за надворешни работи во Москва во февруари и оттогаш е активен.
„Убедени сме дека меѓународната заедница треба активно да соработува со новата авганистанска влада, охрабрувајќи ги чекорите насочени кон нејзиното официјално признавање од страна на ОН и сите нејзини учеснички“, рече Лавров на собирот. На собирот присуствуваа министрите за надворешни работи на Русија, Кина и Пакистан, Таџикистан, Туркменистан и Узбекистан. Средбата се одржа во источниот кинески град Тункси.
Талибанците ја презедоа контролата врз Авганистан во август минатата година кога меѓународните сили се повлекоа од земјата по две децении борби.
Повеќето земји во светот не ја сметаат талибанската влада за легитимна поради загриженоста дека милитантите не ги исполнуваат ветувањата за почитување на човековите права. Сепак, на 17 март, Советот за безбедност на Обединетите нации гласаше за воспоставување официјални врски со Авганистан.