Премиерите на Полска, Чешка и Словенија подоцна ќе отпатуваат за Киев на средба со претседателот Володимир Зеленски. Посетата ја потврди и полската влада, која соопшти дека целта на патувањето е „потврда на недвосмислената поддршка на целата Европска унија за суверенитетот и независноста на Украина“.
„Целта на оваа посета е исто така да се претстави широк пакет поддршка за Украина и Украинците“, соопштија од полската влада.
Чешкиот премиер Андреј Бабиш додаде дека официјалната посета на Европскиот совет била со цел да се повтори поддршката за слободата и независноста.
Во меѓувреме украинскиот претседател Володимир Зеленски во текот на ноќта објави уште една видео порака во која изрази внимателен оптимизам за тековните мировни преговори со Русија. Тој тврди дека Русија почнува да сфаќа дека победата нема да дојде на бојното поле.
„Тие веќе почнаа да сфаќаат дека војната нема да постигне ништо“, рече Зеленски.
Претседателот, исто така, директно им се обрати на руските војници, велејќи:
„Ако им се предадете на нашите сили, ние ќе се однесуваме со вас онака како што треба да се однесуваат со луѓето“.
Во меѓувреме жителите на Мариупол се борат да пристапат до клучните резерви, вклучително и храна, бидејќи сè уште се отсечени од хуманитарна помош. Украинската вицепремиерка Ирина Верешчук изјави дека ќе има нов обид за испорака денеска, откако претходниот обид беше запрен.