Собранието ја усвои Потребата од донесување Декларација за осуда на воените напади кои го загрозуваат територијалниот интегритет и суверенитет на Украина, по скратена постапка. Со „за“ гласаа 104 пратеници, тројца беа „против“, а еден „воздржан“.
Декларација е по предлог на пратеничките од ЛДП и ДОМ, Моника Зајкова и Маја Морачанин. Зајкова, облечена во боите на украинското знаме, рече дека цената за војните низ историјата ја плаќаат невини луѓе и изрази надеж дека пратениците ќе бидат единствени во донесувањето на декларацијата.
„Законодавниот дом, како највисока институција во една парламентарна демократија, не смее да молчи на случувањата и мора итно да ја осуди воената агресија која се случува во срцето на Европа и да искаже јасна заложба за почитување на територијалниот интегритет и суверенитет на Украина. Во дипломатијата важи едно правило дека секое молчењето е согласност или одобрување, затоа не смееме да молчиме“, истакна Зајкова.
Пратеничката додаде и дека случувањата во Украина се еклатантно кршење на меѓународното право и сериозна закана за мирот во Европа.
Претседателот на Собранието Џафери ги задолжи Комисијата за надворешна политика и Законодавно правната комисија да расправаат по Предлог-декларацијата.
Руската инвазија на нејзиниот сосед Украина започна на 24 февруари. За денеска во Белорусија беше закажана втората рунда преговори меѓу украинската и руската делегација.