Од АД ЕСМ, подружица „Енергетика” соопштија дека вршат непречено снабдување со топлинска енергија на корисниците во Скопје, приклучени на топловодната мрежа на Енергетика. Испораката на топлинска енергија, како што се наведува, е континуирана и се врши согласно мрежните правила.
„Од страна на Управниот одбор на АД ЕСМ, раководството на „Енергетика” и експертски тимови се следи состојбата со енергенсите на светско и домашно ниво, со оглед на вртоглавиот раст на цената на природниот гас, кој се користи како основен енергенс во производството на топлинска и електрична енергија во „Енергетика” и е навремено обезбеден“, информира АД Електрани на Северна Македонија.
Преку АД ЕСМ-Енергетика со парно греење се снабдуваат околу 3500 домаќинства, 17 основни и средни училишта и детски градинки и 75 деловни субјекти во скопските населби Железара, Автокоманда, Триангла, Маџари и Хиподром.
РКЕ: Потрошувачите може да поднесат приговор за парното
Регулаторната комисија за енергетика и водни услуги (РКЕ) соопшти дека потрошувачите кои не добиле соодветна услуга од снабдувачот со топлинска енергија може да поднесат приговор до нив.