Вкупниот број на регистрирани случаи на Ковид-19 ширум светот надмина 300 милиони, според извештајот на Универзитетот Џон Хопкинс. Високо заразната варијанта на омикрон доведе до рекордни инфекции во десетици земји, иако се верува дека сојот предизвикува помалку тешки болести и помалку смртни случаи од претходните видови, особено за вакцинираните лица.
Сепак, здравствените експерти предупредуваат дека огромниот број на инфекции ќе ги оптовари здравствените системи ширум светот. Шефот на Светската здравствена организација (СЗО), Тедрос Аданом Гебрејесус оваа недела рече дека омикрон не треба да се категоризира како благ, бидејќи „тој хоспитализира и убива луѓе“.
„Всушност, цунамито на случаи е толку огромно и брзо што ги поразува здравствените системи ширум светот“, рече тој.
Се верува дека вистинскиот број на заразени на глобално ниво е неколку пати поголем. Речиси 5,5 милиони луѓе умреле од оваа болест ширум светот, но СЗО проценува дека вкупниот број на смртни случаи може да биде два до три пати поголем.
Брзото ширење на варијантата омикрон ги принуди европските земји да ги подготват болниците, а официјалните лица продолжуваат да изразуваат загриженост дека сегашниот пораст на инфекции може да резултира со преплавување на здравствените установи во рок од неколку недели.