Министерот за надворешни работи Бујар Османи денеска на покана на државниот секретар за надворешни работи, Комонвелт и развој на Британија Лиз Трас ќе учествува на состанокот на министри за надворешни работи од Западен Балкан што ќе се одржи во Лондон. На состанокот како специјални гости се поканети Стјуарт Пич, специјалниот претставник на Британија за Западен Балкан, Мирослав Лајчак, посебен претставник на ЕУ за Западeн Балкан и дијалогот Белград – Приштина и Габриел Ескобар, заменик помошник државен секретар за европски и евроазиски прашања и специјален претставник на САД за Западен Балкан.
Јанев: Позицијата на Бугарија за С.Македонија е непроменлива
Во програмата на Османи се предвидени одвоени билатерални средби со Лиз Трас, Габриел Ескобар, Стјуарт Пич и Мирослав Лајчак, а ќе се сретне и со Мартин Викерс, специјален пратеник за трговија со Западен Балкан на Премиерот, Борис Џонсон. Главна тема на дискусија ќе биде Западниот Балкан од аспект на економскиот развој и регионална интеграција, можностите за зголемување на трговската соработка, евро-атлантската перспектива, борбата против пандемијата, предизвиците на регионалната безбедност, вклучително и перспективите за надминување на отворените прашања во духот на добрососедските односи во насока на постигнување просперитетен, демократски и стабилен Регион.