Идентификувани се сите 45 жртви од автобуската несреќа на автопатот „Струма“, изјави денеска заменик-главниот обвинител и директор на Националната истражна служба Борислав Сарафов за БТА.
Туристичкиот автобус, во кој главно имало македонски државјани, се запали ноќта меѓу 22 и 23 ноември на враќање од Истанбул во Скопје. Во несреќата загинаа 45 луѓе, а седум се повредени. По несреќата беа прогласени денови на жалост во Македонија и во Бугарија.
Идентификацијата на жртвите е направена со ДНК профили, појасни Сарафов.
Вчера од болницата Пирогов беше пуштен и последниот пациент примен на лечење по несреќата. Тој со медицинска екипа беше пренесен во Македонија.
Со указ на јавниот обвинител, вчера е дадено одобрение посмртните останки на жртвите да им бидат предадени на претставници на Владата на Република Северна Македонија за транспорт и трансфер на нивните роднини, рече Сарафов.
Бугарската влада ќе помогне во транспортот со обезбедување на воен авион.
„Посмртните останките ќе бидат донесени в петок и преку организиран државен протокол ќе им бидат предадени на семејствата во нивните домови“, изјави вчера портпаролот на македонската влада Муамет Хоџа.
Првично имаше две верзии на кои работеа истражителите - човечка грешка или техничка неисправност на автобусот. Минатата недела бугарските власти, кои ја водат истрагата, објавија дека водечката верзија е човечка грешка, потпомогната со лошите ознаки на патиштата, лошата организација на сообраќајот и лошата сигнализација на автопатот.