Германската влада изрази голема загриженост поради руското уништување на сателити и оцени дека се потребни итни мерки за зајакнување на безбедноста и довербата во вселенските операции. „Ги повикуваме сите земји конструктивно да се вклучат во овој процес и во развојот на принципите за одговорно однесување во вселената“, се вели во соопштението на германското Министерство за надворешни работи. Русија завчера погоди стар советски сателит по што, според Вашингтон, бил предизвикан „облак“ отпад потенцијално опасен за Меѓународната вселенска станица и голем број други сателити.
САД ја обвинуваат Русија за невнимателен тест во вселената
„Таквото неодговорно однесување носи висок ризик од грешка во проценката и ескалација“, соопшти германската влада. „Тестот укажува на растечките закани и ризици за безбедноста и стабилноста во вселената“, соопшти германското министерство, додавајќи дека покажува колку е итно меѓународната заедница да се договори за прописите за мирно и одржливо користење на вселената и „мерките за зајакнување на безбедноста и довербата“. По еден ден молк, руското Министерство за одбрана вчера соопшти дека „успешно“ бил уништен неактивен сателит од типот „Целина-Д“, кој е во орбитата од 1982 година, без да наведе кое оружје е употребено. Руското министерство ги осуди за „лицемерни“ изјави на Вашингтон за опасноста од отпадот.