Руското Министерство за надворешни работи соопшти дека американскиот амбасадор во Москва Џон Саливен бил повикан на разговор поради наводно мешање на САД во изборите. Министерството соопшти дека Саливен денеска се сретнал со заменик министерот за надворешни работи Сергеј Рјабков, каде што бил информиран дека Москва има докази за прекршување на рускиот закон од американските технолошки гиганти пред парламентарните избори.
„За време на разговорот, беше истакнато дека руската страна поседува непобитен доказ за кршење на руското законодавство од страна на американските дигитални гиганти во контекст на подготовка и спроведување на избори за Државната дума на Федералното собрание на Руската Федерација“, се вели во соопштението, додавајќи дека таквото мешање е неприфатливо.
Државните новински агенции ТАСС и Риа Новости објавија дека Саливен пристигнал и го напуштил министерството во Москва по 20 минути без да коментира зошто бил таму.
Во последните месеци руските власти, вклучително и претседателот Владимир Путин постојано ги обвинуваат фирмите како што се Фејсбук, Твитер и ВатсАп дека не се придржуваат кон локалните закони за прашања како што се чување на лични податоци и отстранување на содржини за кои се смета дека се незаконски.
Во последните месеци, московските судови ги казнија Гугл, Фејсбук, Твитер, Ватсап, Телеграм и ТикТок со милиони рубљи за овие прашања.
Многу критичари велат дека притисокот нема никаква врска со „интегритетот на интернет“ и наместо тоа ги обвинија властите дека се обидуваат да го ублажат несогласувањето со парламентарните избори закажани на 19 септември и намалувањето на популарноста на владејачката „Обединета партија“.