Германскиот министер за надворешни работи Хајко Мас денеска рече дека Узбекистан има волја да ги отвори границите за луѓето кои бегаат од талибанската власт во Авганистан а кои се на германската листа и имаат потреба за евакуација од земјата зафатена со војна.
Зборувајќи за време на четиридневната посета на Централна Азија, Пакистан и Блискиот исток, Мас рече дека во фокусот на неговата агенда е состојбата во Авганистан и понатамошната евакуација на германските државјани и Авганистанците кои се сметаат за ризични групи, како активисти за човекови права и новинари.
Германија, како што рече тој, планира да преземе 40 000 луѓе од Авганистан или преку аеродромот во Кабул, кој се планира да биде отворен до утре, или преку копнен пат во соседните земји.
"Узбекистан е подготвен да ни помогне со оваа група луѓе“, рече Мас денеска во узбекистанскиот главен град Ташкент.
Од таму тој треба да отпатува во Таџикистан, а следниот ден во Пакистан.
Вчера во Турција Мас вети економска и хуманитарна помош на земјите кои граничат со Авганистан.