Задолжителни рапид тестови еднаш или два пати седмично ќе треба да прават невакцинираните вработени во јавниот и приватниот сектор и за еден да платат по 10 евра. За невакцинираните ќе биде задолжителен негативен тест за патување со брод, автобуси, воз или авион. Во затворени јавни простории смеат да влегуваат само вакцинирани против ковид-19. Ова се сами дел од од мерките во Грција, кои стапуваат во сила на 13 септември и ќе важат до 31 март следната година.
Грчкиот министер за здравство Василис Кикиљас соопшти дека за учениците, задолжителни се два брзи теста седмично, кои ќе бидат бесплатни.
Новите правила ќе важат за невакцинираните вработени во туризмот, образованието, угостителство, во телевизиските, театарските, кинематографските и музичките продукции, како и за студентите задолжени се два тестови седмично, кои исто така ќе ги чинат по десет евра од тест и ќе бидат на сопствен трошок.
За Македонците условите за влез во Грција остануваат исти до 27 август
Според податоците од Националната организација за јавно здравје, над 90 отсто од пациентите на Одделите за интензивна нега наменети за Ковид-19 се невакцинирани. Министерот Кикиљас изјави дека нема повторно болниците да стануваат само ковид центри.
Граѓаните кои планираат да патуваат со автобус, воз, брод или авион кон сите дестинации во Грција, а се невакцинирани, ќе треба, 48 часа пред патувањето да направат брз рапид тест, исто така по цена од десет евра.
Во однос на тестовите, Кикиљас соопшти дека од 13 септември во државните дијагностички центри, тестовите ќе бидат бесплатни само за вакцинираните или за лицата со симптоми.
Грција не размислува за затворање граници
За невакцинираните, за онаму каде што ќе им бидат потребни негативни рапид тестови, ќе треба на свој трошок да се тестираат. Влез во внатрешните делови на кафулињата, баровите, рестораните, таверните, ноќните клубови, како и во спортските сали, од 13 септември ќе биде дозволен само за вакцинирани лица и за оние кои во изминатите шест месеци прележале Ковид-19.
За театрите, музеите, археолошките локалитети, како и за фитнес центрите и спортски клубови, влез е дозволен за вакцинирани, за оние кои прележале, но и за оние кои имаат негативен тест направен 48 часа претходно.
За употребата на маска, и понатаму задолжителна е во затворените простори, но и надвор доколку има гужва.