За да се намали метежот и да се забрза процесот за вакцинација против ковид-19 во Тетово треба да се отворат нови објекти каде ќе се врши имунизација, велат од Кризниот штаб на Општина Тетово. На денешниот состанок од заменик-министерот за здравство Илир Хасани од Кризниот штаб побарале да се отворат нови вакцинални пунктови и во градот и во руралните средини.
„Во текот на неделата, во градот ќе бидат отворени дополнителни пунктови за вакцинација, како што се Домот на Армијата, жичарницата на Елем Турс, Центарот за култура во Тетово и амбулантата во село Порој“, велат од Општина Тетово.
Кризниот штаб побарал да се отворат пунктови и Боговиње, Теарце, Брвеница, Желино и Јегуновце.
Последните две недели во Тетово значително е зголемен бројот на вакцинирани. Од 1.500 до 1.800 луѓе дневно примаат првата доза, а се ревакцинираат и до 2.300 луѓе дневно.
Било побарано и пунктовите да работат подолго и во три смени за да може да се вакцинираат повеќе луѓе.
Од Кризниот штаб апелираа матичните лекари да волонтираат во Здравствениот дом во Тетово со цел да помогнат и да учествуваат во процесот на вакцинација.
Епидемиолошката состојба во Тетово и регионот е крајно критична, со 1855 активни случаи. Само за викендот повеќе од 257 лица во Тетово побарале прегледи и болничко лекување поради симптоми и тешка здравствена состојба.