Јавното обвинителство соопшти денеска дека по спогодбите со седуммината припадници на таканаречената група од Гази Баба осомничени во предметот „Планина“, Основното јавно обвинителство за гонење на организиран криминал и корупција склучи Предлог- спогодби со уште седум лица од групата во Грчец.
„Откако беа запознаени со доказите што обвинителството ги прибави во текот на спроведувањето на предистражната и истражната постапка, го признаа извршувањето на кривичното дело за кое се товарат. Судијата на претходна постапка при Основиот кривичен суд-Скопје ги прифати Предлог- спогодбите и лицата ги огласи за виновни за сторено кривично дело- Неовластено производство и пуштање во промет наркотични дроги, психотропни супстанции и прекурсори предвидено и казниво по член 215 став 3 во врска со став 1 од Кривичниот законик“, наведуваат од обвинителството.
Тие добија казна затвор од вкупно 24 години. Највисоката казна е 5 години затвор, а најниската 3. Тие се упатени на издржување на изречената казна, а за останатите истражната постапка е во тек.