Се уште се активни пожарите во Пехчево, Сарај во Скопје, Петровец, Старо Нагоричане, Прилеп, Штип, Битола, соопшти Центарот за управување со кризи (ЦУК), согласно состојбата до 8 часот. Пожарот во делчевско е под контрола и нема опасност од негово ширење, а локализиран е и пожарот во атарот на селата Дрен – Смолане, прилепско.
Како што соопшти ЦУК, пожарите во село Трботивиште – Нов Истевник место викано Света Вода и село Разловци во општина Делчево се во потполна контрола и нема никаква опасност од нивно ширење.
Во општина Берово се уште е активен пожарот на потегот Будинарци-Митрашинци каде што гори борова шума. Во Скопскиот регион, во Општина Сарај, пожарот кај Раовиќ – Буковиќ се движи кон сртот, нема опасност за селата, гори мешана шума и е на доста непристапен терен. Во врска со пожарот кај Катланово, односно Дивље и Крушје (општина Петровец), поради интевенција од воздух, гасењето од земја било оневозможено.
Во Битолскиот регион, во текот на вчерашниот ден повторно е реактивиран пожарот кај село Топлица, општина Прилеп, покрај магистралниот пат Прилеп-Градско. Според последните информации реактивираниот пожар се движи кон атарот на село Крстец. Гори дабова и букова шума и сува трева. Во Кумановскиот регион од ноќеска повторно е активен пожарот во атарот во село Дренк.
Од ЦУК и детално информираа кои, од каде и колку екипи ги гаснат пожарите на терен.