Европскиот парламент со огромно мнозинство гласови го изгласа ратификувањето на трговскиот договор по Брегзит меѓу Велика Британија и Европската унија. Пратениците на ЕУ го поддржаа договорот за трговија и соработка со 660 гласа „за“, 5 „против“ и 32 воздржани, објави денеска Европскиот парламент.
Гласањето се одржало претходниот ден. И покрај договорот на повеќе од 1.000 страници, кој стапува на сила на 1 мај, Европскиот парламент ја предупреди Велика Британија дека мора да се држи до своите обврски.
Договорот ги опфаќа трговските односи, правилата за конкуренција, аранжманите за риболов и идните услови за соработка во областа на полицијата и правдата, транспортот и енергијата. Со договорот се стави крај на четири години преговори и дебати, откако Велика Британија донесе одлука по 47-годишното членство во ЕУ да го напушти блокот.
Претседателот на Европскиот совет Шарл Мишел на Твитер напиша дека дека Велика Британија ќе остане „важен пријател и партнер на ЕУ“.
"Јас топло ги поздравувам резултатите од гласањето на Европскиот парламент за договорот за трговија и соработка меѓу ЕУ и Велика Британија. Тоа претставува голем чекор напред во односите меѓу ЕУ и Велика Британија и отвора нова ера", се наведува во твитот на Мишел.