Премиерот Зоран Заев денеска изјави дека Владата останува фокусирана на пронаоѓање на решение со Бугарија по блокадата од страна на Софија на преговарачката рамка на Македонија со ЕУ.
„Ја чувствувам горчината на народот, но мене ми припаѓа да ги решавам тешките прашања на нашиот пат до ЕУ. Да не заборавиме, за време на бугарското претседателство со ЕУ го вратија фокусот на тоа што го определува членот 2 од нашиот Договор за пријателство и соработка. Цел Самит беше посветен на нашите аспирации. Денеска го гледав видеото на Борисов. Тоа е Бојко Борисов. Тоа е неговата посветеност и во тоа јас гледам надеж дека час поскоро треба да го решиме спорот со Бугарија, без оспорување на нашите идентитетски определби“, рече премиерот Заев во интервју за ТВ Телма.
Тој додаде дека останува и посветеноста за соработка со земјите-членки на ЕУ од кои во наредниот период ќе побара експертиза и помош за одделни области со цел, како што рече, Европа да се донесе дома.
Борисов денеска преку видео на неговата страна на Фејсбук порача дека бил изненаден од изјавата на Заев, кој го обвинил дека „работел на подигнување на личниот рејтинг“ и дека Бугарија не го почитувала Договорот за пријателство.