Европската агенција за лекови (АЕЛ) предвидува дека ќе даде одобрение за првата вакцина против коронавирусот до крајот на годинава со очекуван почеток на дистрибуцијата од јануари, изјави денеска директорот на Агенцијата.
„Ако податоците се солидни, би можеле да дадеме зелено светло за првата вакцина до крајот на годинава и да почнеме со дистрибуција од јануари“, рече Гвидо Раси, директор на ЕАЛ во интервјуто објавено денеска во италијанскиот весник Ил Соле 24 Оре.
Таа институција е задолжена за одобрување и контрола на лековите во ЕУ. Конечното зелено светло, кое го дава Европската комисија, ќе овозможи лабораториите да почнат со продажба на својот лек во целата ЕУ. ЕАЛ, која смета дека ќе има шест или седум различни вакцини на располагање во 2021 година, вчера ги добила првите клинички податоци од Фајзер за неговата вакцина. Раси рече и дека ги добиле претклиничките податоци од Астра Зенека, пробите над животни веќе се проценуваат и дека имале повеќе разговори со компанијата Модерна.
Ако вакцината се стави на пазарот во јануари, нејзините први ефекти врз ширењето на вирусот „ќе бидат видливи за пет-шест месеци, во суштина наредното лето“, рече тој.
„Очигледно дека нема да може да се вакцинира целиот свет, но ќе почнеме со најизложените категории како што се повозрасните лица и вработените во здравството, што ќе почне да ги блокира мостовите на пренос“, рече тој.
Раси оцени дека треба да се вакцинира над половина од европското население за да може да дојде до смирување на пандемијата, што значи дека ќе бидат потребни „најмалку 500 милиони дози во Европа“. За сите да се вакцинираат ќе биде потребно најмалку една година и „ако се помине добро, до крајот на 2021 година ќе имаме доволна имунизација“, рече Раси.