Министерот за здравство, Венко Филипче, денеска ги отфрли како шпекулации информациите дека ќе се воведува полициски час во државата или викенд-карантин по примерот на некои земји од регионот.
„Ова е тежок и комплексен период, да ги почитуваме мерките за заштита од ковид-19, да нема групирање на повеќе од четири лица на јавните места. Капацитетите на болниците се преоптоварени, како и медицинскиот персонал. Засега сметаме дека овие мерки се сосема доволни и ако во следниот период се почитуваат, тие ќе дадат соодветни резултати“, рече Филипче и додаде дека сепак има место за пациентите.
- Нема реална слика за поддршката на анти-корона рестрикциите
- За 24 часа 299 пријави за неносење заштитна маска за лице
Одговарајќи на новинарско прашање, Филипче рече дека како Министерство имаат увид и во бројот на смртноста на пациентите, кои се заразени од Ковид-19, а се лекуваат во приватните болници.
„Ќе ги обезбедиме точните бројки, но исходот кај најтешките случаи е ист како и во јавното здравство“, рече Филипче.
Прашан, зошто во државните болници не се користи третманот за филтрација, односно прочистување на крвта, кај заразените од корона вирусот, а за кој граѓаните на фејсбук собираат пари, за да одат во приватните клиники, министерот рече: „Нема медицински доказ дека тоа помага за оваа конкретна болест“.