Софија денеска ќе биде домаќин на самитот на Берлинскиот процес, на кој лидерите на шест земји од Западен Балкан треба да усвојат план за создавање заеднички регионален пазар и да потпишат заедничка декларација. Официјалниот дел од состанокот, ко-претседаван од Бугарија и Северна Македонија, ќе го отворат германската канцеларка Ангела Меркел, европскиот комесар за проширување Оливер Вархеји и генералниот секретар на Советот за регионална соработка Мајлинда Брегу. На пленарната сесија на тема „Нови можности и предизвици за Берлинскиот процес: Заеднички регионален пазар и зелена агенда за Западен Балкан“ ќе се обратат шефовите на делегациите на шестте земји од Западен Балкан, како и претставници на ОЕЦД, ЕБОР, ЦЕФТА и други меѓународни организации.
Без договор Скопје-Софија, нема напредок на Македонија кон ЕУ
За време на самитот во Софија, лидерите на Албанија, БиХ, Црна Гора, Косово, Северна Македонија и Србија треба да потпишат заедничка Декларација за Берлинскиот процес. Заклучоците од самитот во Софија, како копретседатели, ќе ги сумираат премиерите на Бугарија и Северна Македонија, Бојко Борисов и Зоран Заев и германската канцеларка Ангела Меркел. Берлинскиот процес беше инициран од германската канцеларка Ангела Меркел во 2014 година и ги обединува Западен Балкан и ЕУ, со цел забрзување на процесот на евроинтеграција на регионот. Досега се одржани шест самити: во Берлин (2014), Виена (2015), Париз (2016), Трст (2017), Лондон (2018) и Познањ (2019).