Француската влада во вторник пред Парламентот детално ќе го претстави планот за олабавување на мерките и рестарт на втората по големина економија во еврозоната, која е силно погодена од кризата предизвикана од пандемијата на коронавирус.
Премиерот Едуар Филип на Твитер напиша дека во Парламентот ќе ја претстави „националната стратегија за отворање“.
Пратениците, пред гласањето, ќе расправаат за владиниот предлог.
Тимови на владини експерти со недели работат на пронаоѓање рамнотежа меѓу повторното отворање на економијата, а да избегнат втор бран на епидемијата на коронавирусот.
Претседателот Емануел Макрон веќе најави дека затворањето на Франција, кое е на сила од 17 март и е меѓу најстрогите во Европа, ќе почне да се ублажува од 11 мај.