Обвинителката Фатиме Фетаи вели дека институциите со брзина на светлината сега испитуваат за земените бонуси во СЈО. Таа вели дека сè ќе било поинаку доколку на ист начин се постапувало и во другите истраги. Фетаи вели дека обвинителите во СЈО земале месечна плата од 1.200 евра, а за бонусите рече дека сето тоа е опфатено со Законот за Специјално јавно обвинителство.
Фетаи денеска пред рочиштето за случајот Монструм рече дека предметите кои се во фаза на истрага седат во кутии и обвинителите наместо да си ја работат работата станале магационери и архивари, а поради тоа некои лица наместо да седат во обвинителна клупа, делат правни совети. Таа рече дека конкретно зборува за случајот „Моќник“ и осомничениот Антонијо Милошоски.
За вчерашната посета на истражители на ОЈО на СЈО, Фетаи рече дека станувало збор за собирање на документи, не за претрес.