Најмалку 105 лица се повредени во земјотресот што вчера ја погоди територијата на Албанија. Ова го потврдуваат првичните податоци објавени на вонредната владина седница одржана на полноќ. Земјотресот оштетил повеќе од 290 домови , а пукнатини се појавиле на 20 станбени згради, пренесува АТА. Поради земјотресот, албанскиот премиер Еди Рама го откажа патувањето на Генералното собрание на ОН во Њујорк.
По првиот земјотрес со јачина од 5,8 степени според Рихтер, уште еден силен земјотрес ја погоди областа на Албанија околу полноќ, со јачина од пет степени со епицентар кај Драч, а потоа се почувствувала серија на помали земјотреси. Епицентарот на земјотресот беше во Јадранското Море, на длабочина од десет километри.
По двата силни земјотреси, кои вчера после 16 часот ја погодија Албанија, а многу силно се почувствуваа и во Црна Гора, Заводот за сеизмологија на Црна Гора регистрирал повеќе од 60 земјотреси со помала магнитуда, соопшти сеизмологот Марин Чавелиќ. Тој за РТЦГ истакна дека по толку силни земјотреси вообичаена е серија помали, која сигурно ќе трае и наредните денови.