Францускиот претседател Емануел Макрон денеска упати критика по неуспехот на самитот на ЕУ да се донесе одлука за клучните позиции во европскиот блок. Но, тој додаде и дека се надева на договор на утрешните разговори.
„Денешниот ден заврши со неуспех и тоа е многу лоша слика и за Советот и за Европа. Јасно е дека овој неуспех се сведува понекогаш на лични амбиции“, порача Макрон.
Лидерите на земјите-членки на ЕУ беа блиску до договор за холандскиот социјалист Франс Тимерманс да ја преводи Европската комисија. Но, тоа е само една од петте позиции за кои се разговара, вклучувајќи го и претседателот на Европската централна банка.
Бугарскиот премиер Бојко Борисов изјави дека кандидатот на земјата Кристалина Ѓорѓиева е надвор од трката за функцијата претседател на Европскиот совет.