Два нови случаи со мали сипаници денеска се лабораториски потврдени. Станува збор за 18-месечно дете од општина Чаир и за четиригодишно дете од општина Аеродром кои биле невакцинирани. Тие се пренесени на Клиниката за инфективни болести во Скопје.
Ова денеска на прес-конференција го истакна министерот за здравство Венко Филипче кој рече дека со овие два случаи вкупниот број на заболени со морбили изнесува 19. Од заболените, 11 биле пренесени на Клиниката за инфективни болести, од кои четири се пуштени на домашно лекување. Потенцира дека за едно лице на возраст од 30 години кое е вакцинирано со една доза вакцина и за уште едно лице на возраст од 28 години кое има непознат вакцинален сататус се чека поврда од крвните анализи.
“Досега се вакцинирани 1.300 деца”, рече Филипче и упати апел до родителите да ги вакцинираат децата за да се спречи епидемијата на морбили.
Во врска со грешката на „Македонија лек“, кај која се пронајдени вакцини со постар датум за користење тој изјави:
„Ја контактиравме компанијата и тие спровеле внатрешна истрага. Нема да дозволиме ништо да го покрива угледот на нашиот здравствен систем. Правиме се да го вратиме угледот. Ќе ги преземеме сите мерки да се справиме со ова, да укажеме за тоа каков проблем се јавил и ќе преземеме се што треба за да кажеме дека сме сериозна власт. Отприлика еден процент од вакцините се со декларација на којашто има постар датум“, истакна Филипче.