Рускиот претседател Владимир Путин вети дека ќе ги испита наводите за прогонот на Јеховините сведоци во неговата земја. Русија минатата година ја забрани таа христијанска заедница и ја прогласи за екстремистичка организација. Против скоро 100 Јеховини сведоци е поднесено обвинение, а 25 се во притвор.
Активистите за човекови права минатата недела пред Путин го отворија прашањето за Јеховините сведоци. Рускиот претседател ги критикуваше обвиненијата против верниците за екстремизам како „бесмислица“ и вети дека ќе ги испита тековните случаи. Кремљ вчера ги објави неговите коментари. Пред забраната, светската централа на Јеховините сведоци тврдеше дека во Русија има околу 170 илјади верници.