Групата на европските социјалдемократи и на зелените поднесоа амандмани во извештајот на Европскиот парламент за земјава поврзани со бегството на поранешниот премиер на Македонија Никола Груевски. За извештајот треба да се гласа идната недела.
Тој беше усвоен во Комисијата за надворешни работи пред неколку недели, но последниот развој на настаните со бегството на Груевски во Унгарија ги наведе социјалдемократите и зелените да поднесат нови амандман во резолуцијата на известувачот Иво Вајгл, за која ЕП во пленарен состав ќе гласа на 29 ноември
Во амандманот на социјалдемократите во ЕП се наведува дека веруваат оти македонските законодавни процеси треба да продолжат во согласност со процедурите во земјата и Никола Груевски треба да одговара пред македонскиот судски систем. Тие ја повикуваат и Унгарија, како земја членка на ЕУ, да го почитува владеењето на правото, кое е, како што наведуваат е фундаментален принцип на Европската унија, за земјите-членки и земјите кандидати еднакво и да го екстрадираат Никола Груевски во Скопје.
Во друг амандман бараат во извештајот исто така да нагласи дека „по транспарентен судски процес, Никола Груевски е осуден од македонските судови за злоупотреба на функција на две години затвор, дека повеќе судови ја потврдија пресудата и одлуката влезе на сила откако ги искористија сите права на жалби, дека е обвинет во четири други кривични премети и пет други кривични истраги во кој тој е инволиварен се во тек“, пишуваат социјалдемократите.
Што се однесува до парламентарната група на зелените, тој е поднесен од страна на Јудит Саргентини, известувачката на Европскиот парламент за владеењето на правото во Унгарија и гласи:
“Ги повикува унгарските власт да ги дадат сите релеавнтни информации и потребни објаснувања кои се однесуваат на случајот со поранешниот македонски премиер Груевски кој избега од својата земја со тајна дипломатска поддршка од Унгарија за да избегне затворска казна; смета дека ова е случај на мешање во внатрешните работи на ПЈРМ и, посебно, чин на презир кон судството и владеењето на правото во оваа земја; ги нотира барањата за екстрадиција од страна на властите во Скопје и очекува Унгарија да се однесува стриктно согласно националните и меѓународните закони со тоа што ќе одговори позитивно на ова барање“, стои во амандманот на Зелените.
Засега е неизвесно дали и кои од овие амандмани ќе бидат поддржани од европратениците идната недела, но извори во Европскиот парламент за МИА велат дека се очекува да има мнозинство за амандманот на социјалдемократите, вклучително и со гласови од Европската народна партија, освен, најверојатно, унгарските пратеници.
Амандманот на зелените се оценува „како помалку избалансиран“ и „преостар“ и за него потешко ќе било тешко да се добие поддршка од другите европарламентарци, велат извори од ЕП за МИА.