Рускиот претседател Владимир Путин потпиша указ со кој се овозможуваат „специјални економски мерки“, како одговор на, како што се наведува, „непријателските активности“ против руски државјани и компании во Украина. Во указот, кој денеска беше објавен на интернет страницата на Кремљ, Путин ја повикува владата да подготви листа на украински фирми и поединци кои ќе бидат цел на економските санкции.
Во указот исто така се посочува дека санкциите може да бидат укинати ако Украина ги укине сите ограничувања против руските граѓани и компании.
Исто како и САД и ЕУ, Киев воведе санкции против руски милијардери, компании и други субјекти како одговор на руската анексија на Крим во март 2014 година и руското мешање во конфликтот во источна Украина.
Во јуни, Путин потпиша закон за противмерки против САД и другите земји кои ѝ воведоа санкции на Русија.