Американскиот претседател Доналд Трамп ги отфрли официјалните податоци дека во Порторико, како последица на минатогодишниот ураган Марија, животот го загубиле 3.000 лица. Тој ги обвини демократите дека го зголемиле бројот на жртви за „да го прикажат во лошо светло“. Трамп на Твитер напиша дека 3.000 лица не ги загубиле животите во бурата.
„Кога го напуштив островот, по бурата, беа од шест до 18 жртви. Потоа, по подолго време, почнаа да известуваат за многу големи цифри, како што е 3.000,“ напиша американскиот претседател на Твитер.
На твитот на Трамп остро реагираше градоначалничката на Сан Хуан, Кармен Хулин Криз, која повеќепати жестоко го критикуваше претседателот и неговата администрација поради одговорот на ураганот, кој ја опустоши американска територија.
Според истражувањето, кое го направи Универзитетот Џорџ Вашингтон, 2.975 смртни случаи на островот, во период од септември минатата година до февруари оваа година, директно или индиректно се поврзани со ураганот Марија.