Франција ја поддржува европската перспектива на земјите од Западниот Балкан и тие по вокација треба да се приклучат кон Европската унија, кога сите критериуми за нивното пристапување ќе бидат целосно исполнети, порача францускиот министер за Европа и надворешни работи, Жан-Ив Ле Дриан во врска со земјите од Западен Балкан, вклучително и Македонија.
Ставот на Ле Дриан го пренесе портпаролката на француското министерство за Европа и надворешни работи, Ањес Фон Дер Мил, соопшти француската Амбасада во Скопје.
„Во исто време, ЕУ треба да се преизгради и нејзиното функционирање да се подобри пред да биде во можност да прими нови земји-членки. Заклучоците усвоени од Советот на 26 јуни оваа година се однесуваат на тие моменти. Без одлука во оваа фаза за отворање на пристапните преговори на ЕУ со Македонија и Албанија, заклучоците ги вреднуваат напорите на овие земји направени во последниве месеци за нивно приближување до Унијата. И покрај тоа што не е формален критериум за процесот на проширување, спогодбата од јуни во врска со името меѓу Македонија и Грција претставува значаен развој на настаните за регионот“, смета Ле Дриен.
Во врска со членството во НАТО, Ле Дриан смета дека склучувањето на договорот ја оправдува поканата за започнување на разговорите за пристап кон Алијансата, преку Декларацијата од Самитот во Брисел.
Што се однесува до отворањето на преговорите за пристапување кон Европската унија, тој додава дека заклучоците на Советот од јуни предвидуваат одново да се преиспита состојбата во Албанија и во Македонија, во јуни 2019 година, врз основа на извештајот на Комисијата и со оглед на големиот број критериуми, вклучувајќи го и напредокот во борбата против корупцијата и организираниот криминал.