Владата на Македонија донесе одлука да испрати финансиска помош од шест милиони денари за справување со катастрофалните пожари што овие денови ја зафатија пошироката околина на главниот град Атина. Како што соопшти владината прес-служба, Владата дополнително донесе одлука да формира координативно тело кое на дневно ниво ќе ја следи состојбата и ќе координира соодветна хуманитарна помош, што ќе се договори како потреба со надлежните институции во Грција и со градот Атина. Владата донесе одлука за финансиска помош во иста висина, од шест милиони денари, да биде испратена и на Јапонија за поддршка во справувањето со последиците од земјотресот што неодамна ја погоди оваа земја.