ЕУ ја потврдува јасната подршка на европската перспектива на Западен Балкан, а европскиот пат ќе зависи од поставените критериуми и од одделните заслуги, се наведува во предлог текстот на завршната декларација на Самитот ЕУ-Западен Балкан во Софија, објави МИА, повикувајќи се на српската државна телевизија РТС, која објавила делови од предлог-текстот на завршната декларација на Самитот ЕУ-Западен Балкан.
Во текстот се наведува подготвеноста на ЕУ за „засилување на ангажманот на сите нивоа со цел политичка, економска и социјална трансформација на регионот, вклучувајќи и зголемена финансиска и техничка помош, во зависност од напредокот на партнерите од Балканот во владеењето на правото“.
За возврат, ЕУ очекува од своите партнери од Западен Балкан да „потврдат дека европската перспектива е нивни цврст стратешки избор на кој ќе работат засилено“, како и да „дадат приоритет на демократијата, владеењето на правото и почитувањето на човековите и малцинските права“, објави МИА.