Премиерот Зоран Заев за време на дводневната работна посета на Велика Британија, се сретна со вршителот на должност заменик помошник државен секретар за Европа и Евроазија во Стејт департментот на САД, Метју Палмер, информираат од владината прес служба.
Од таму наведуваат дека премиерот Заев на средбата истакнал дека САД се стратегиски партнер на Македонија и дека асистенцијата на американската администрација во спроведувањето на домашните реформи е од исклучително значење. Тој нагласил и дека цели на Македонија се членство во ЕУ и НАТО и оти нема друга алтернатива.
Палмер, пак, како што се наведува во владиното соопштение, ги поздравил напорите на новата влада за демократски реформи и го поддржал процесот на ЕУ и НАТО интеграции најавувајќи дека продолжува поддршката од САД.
„Владата заслужува честитки и за надминување на отворените прашања со соседите. Членството на Република Македонија во ЕУ и НАТО ќе биде добро за целиот регион, како и од огромна корист за сите граѓани на РМ“ рекол Палмер, а пренесуваат од Владата.