Планинарското друштво „Трансверзалец“ ги доставило сите потребни информации до соодветните институции во врска со загинувањето на Калина Велевска и Александар Миновски, објави планинарското друштво на социјалните мрежи наведувајќи дека со изјава ќе излезе в петок по завршувањето на истрагата и објавувањето на извештајот. Понатаму тие изразија жалење и сочувство до семејствата за загинатите планинари.
Во врска со случајот, Федерацијата на планинарски спортови на Македонија соопшти дека формирале посебна комисија од нивни членови и експерти која ќе ги анализира околностите под кои загинаа двајцата планинари.
Претходно, семејствата на загинатите преку писмо изразија сомневање во професионалноста на организаторите на турата и бараа одговорност. Калина Велевска и Александар Миновски загинаа при искачување на врвот Кајмакчалан на планината Ниџе изминатиот викенд. Тие беа погребани денеска.