Руски патнички авион со 71 патник се урнал веднаш по полетувањето од московскиот аеродром, соопштија руските власти. Авионот Антонов Ан-148 на компанијата Саратов ерлајнс летал од аеродромот Домодедово кај Москва, јавуваат руските медиуми. Тој исчезнал од радарите веднаш по полетувањето, а се урнал во близина на селото Аргуново, околу 80 километри југоисточно од Москва. Извори од итната медицинска помош велат дека нема шанси да има преживеан во несреќата. И други извори за руските медиуми велат дека се пронајдени делови од авионот, но нема преживеани.
Портпаролот на Владимир Путин, Дмитриј Песков, рече дека претседателот им изразува длабоко сочувство на оние што ги загубија роднините во несреќата.
Во авионот имало 65 патници и шест члена на екипажот.
Министерството за транспорт како можни причини за несреќата ги разгледува временските услови и човечката грешка.