Неколку високи владини претставници од рускиот регион Дагестан во северен Кавказ се уапсени поради обвиненија за финансиска измама, објави Комитетот за истраги.
Комитетот наведува дека дагестанскиот в.д. премиер Абдусамад Гамидов и в.д. вицепремиерите Шамил Исајев и Рајудин Јусуфов денеска биле уапсени под сомневање за злоупотреба на федерални средства наменети за социјални програми.
Поранешниот министер за образование Шахабас Шахов и неколку други луѓе исто така се уапсени, се вели во соопштението во кое се додава дека биле претресувани и домовите на уапсените.
Истражителите во куќата на Гамидов пронашле златен пиштол марка „ТТ“, пиштоли „Берета“, пиштол „Мараков“, две пушки „АК-47“, се вели во соопштението во кое не се укажува на поврзаност на пронајденото оружје со финансиските измами.
Исто така се вели дека осомничените ќе бидат обвинети во блиска иднина и потоа ќе биде донесена одлуката за можни притвори.