Порошенко не е оптимист пред утрешниот самит

Украинскиот претседател Петро Порошенко изјави дека нема многу високи очекувања пред утрешниот самит за решавање на конфликтот во источна Украина. За утре во Берлин е закажан самит на кој ќе учествуваат лидерите на Германија, Франција, Русија и Украина.

„Јас сум многу оптимист во врска со иднината на Украина, но, за жал, не толку оптимист за утрешната средба“, изјави денеска Порошенко кој е во посета на Осло, Норвешка.

Портпаролот на Кремљ, Дмитриј Песков изјави дека е премногу рано да се зборува за каков било специфичен договор.

Средбата е на покана на германската канцеларка Ангела Меркел. Нејзиниот портпарол, Стефан Зајберт, вели дека лидерите треба заеднички да оценат како се спроведуваат договорите од Минск и да разговараат за идни чекори за ставање крај на кризата во Украина.