Српското министерство за внатрешни работи соопшти дека носителот на сириски пасош, кој бил најден до телото на еден од напаѓачите пред стадионот Стад Де Франс во Париз, „на 7 октомври оваа година бил регистриран на граничниот премин Прешево на македонско-српската граница, каде официјално побарал азил.“ Грчкате власти потврдиле дека документот за патување преку островот Лезбос бил издаден на 3 октомври.
Ова е информација која е дел од проширената истрага во Европа по терористичките напади во Париз што се случија на 13 ноември. Француските истражители идентификувале еден од напаѓачите кои во Париз убија најмалку 129 луѓе и повредија повеќе од 350, од кои 99 се во критична состојба. 29-годишниот Омар Исмаил Мостефаи бил идентификуван од отсечен прст пронајден на местото на еден од нападите. Шест лица блиски до Мостефаи биле притворени, вклучително неговиот татко, брат и жената на неговиот брат.
Координираните напади на 13 ноември погодија шест различни локации во францускиот главен град, вклучително концтерна сала, стадион, ресторани и барови.
Обвинителите велат дека биле убиени седум тешко вооружени напаѓачи кои носеле појаси со експлозив. Исламската држава ја презеде одговорноста за нападите, кои се однесуваат на француските воздушни напади во Сирија и во Ирак.
Парискиот обвинител Франсоа Молинс вчера рече дека три координирани тимови на терористите веројатно се одговорни за „овој варварски акт“. Истрагата се прошири низ Европа: белгиската полиција уапси три лица осомничени за врски со париските напади. Германската полиција соопшти дека маж бил уапсен во Баварија, кој истот така бил поврзан со нападите.