Светската фудбалска асоцијација, ФИФА ја суспендира Нигерија од сите натпреварувања поради мешање на политичарите во работата на Фудбалскиот сојуз на таа земја.
Владата на Нигерија нареди отпуштање на челниците на Фудбалскиот сојуз на таа земја, а претседателот на Сојузот Амин Мајгари бил уапсен по враќањето од Светското првенство во Бразил во минатата недела.
ФИФА нареди проблемот да биде решен до 15 овој месец. Покрај репрезентацијата под суспензија се наоѓаат и сите клубови кои во новата сезона нема да може да настапуваат во ниту едно африканско натпреварување.
Казната на ФИФА ќе трае се додека Фудбалскиот сојуз во Нигерија не добие раководство избрано без притисок од политичарите.
На Светското првенство во Бразил, Нигерија ја мина првата фаза, за прв пат по 1998 година, но во осминафиналето загуби од Франција со 2:0.
Пред тој натпревар репрезентативците на Нигерија се побунија против Сојузот бидејќи не добиле награда за пласманот во втората фаза.