Достапни линкови

Преговори за формирање влада, нејасно дали ќе се оди на училиште


Стево Пендаровски и Зоран Заев

Претседателот Стево Пендаровски му го даде мандатот за формирање влада на лидерот на СДСМ Зоран Заев. ВМРО-ДПМНЕ смета дека тоа е противуставно. Во меѓувреме, на две недели до почетокот на школската година нема одлука дали ќе се оди на училиште.

Некогаш помалку некогаш повеќе, но изминатава недела има и тоа колку многу теми што доминираат во печатените и електронските медиуми. Заврши темата дали Заев или Мицкоски ќе биде мандатар за формирање Влада со доделувањето на мандатот на Зоран Заев.

Одиме по ред. „Пендаровски му го предаде на Заев мандатот за составување нова влада“ и „Заев ќе го врати мандатот ако не обезбеди мнозинство“ – ова се само два од повеќето наслови во Нова Македонија. „Нема да го носам мандатот дома, ако не направи влада Заев ќе му го дадам мандатот на Мицкоски, изјави Пендаровски“ – гласи насловот на порталот СДК.МК. Порталот Курир.мк со следниов наслов: „Пендаровски без доказ за мнозинство го даде мандатот на пратеникот Заев, ВМРО-ДПМНЕ ги замрзнува односите кон претседателот на државата“. Оваа вест ја објави и порталот Република и електронските изданија на печатените медиуми.

Инаку, Курир.мк пред два дена излезе со ваков наслов: „Студен туш за Заев: СДСМ нема мнозинство, Пендаровски ќе го крши Уставот, без уверение ќе додели мандат“.

Вечер во изјавата на претседателот Пендаровски гледа признавање дека „мандатот е доделен без докази и спротивно на Уставот“, и заклучува дека „Пендаровски директно му овозможи на Заев купување на време за непринципиелно купување гласови на пратеници“ – го цитира весникот соопштението од најголемата опозициска партија.

Република смета дека мандатот е доделен на „жими мајка – Заев му јавил на Пендаровски дека е на пат да обезбеди мнозинство, а овој му поверувал“. Истиот портал ја цитира изјавата на Мицкоски: „Ниту еден пратеник на ВМРО-ДПМНЕ нема да му даде поддршка на Заев за формирање влада“.

Вечер, покрај другото, ја објавува реакцијата на СДСМ: „Губитникот Мицкоски да го научи Уставот, Заев е мандатар. Очајни се обидите на Мицкоски да пронајде алиби за поразот на изборите“.

Нова Македонија информира за средбата Заев – Ахмети, веднаш по доделувањето на мандатот, и во наслов вади заеднички именител од изјавата на двајцата лидери на партии: „Постојат добри основи за напредок“, најавувајќи дека разговорите помеѓу двете партии ќе продолжат и викендов на ниво на генерални секретари. Порталот Плусинфо пишува: „Заев и Ахмети по три часа разговори: Постигнат е напредок, викендов нови средби“. Неделникот Фокус со фото-шоп фотографија на разголените лидери на СДСМ и на партиите од албанскиот кампус со даски за сурфање и со наслов: „Нудистички коалиции – кој ќе излезе гола вода, а кој голгетер во преговарањата“.

Во еден текст неделникот забележува: „Партиските лидери сепак не се мразат, туку како што покажуваат преговорите за составување владино мнозинство, тие се спремни да се галат, нежно и милно... Идеологијата им е идентична – да се налапаат пари на сметка на работниот народ“.

Владата ќе одлучи за одвивањето на школската година – информираат медиумите. „Комисијата за заразни болести предлага учениците до трето одделение да одат на училиште, другите онлајн“ – пишува Слободен печат, кој ја објавува и изјавата на министерот за образование Арбер Адеми: „Во училиштата каде има мал број ученици, наставата може да се одвива со физичко присуство“.

По стечајот на Еуростандард банка, Вечер објавува: „100.000 граѓани останаа без плата и пензија“, а во друг наслов прашува: „Како пропадна Еуростандард банка? Зошто се молчеше досега?“

Слободен печат објавува дека „Во Минск е тензично по претседателските избори на кои повторно победи Лукашенко, илјадници демонстранти на улиците“ и „Амбасадите на Белорусија и во Москва и во Киев под опсада: Најмалку шест лица уапсени“. Порталите и весниците објавуваат и дека „Антивладините протести во Бугарија не се смируваат веќе 36-ден, шатори во Софија“.

Се разбира, вестите за корона вирусот се неодминливи: сите медиуми информираат дека повторно се зголемува бројот на новозаболени во повеќе европски земји, а дека на пример во Германија, најголем број нови заразени се „увезени“ од земјите на Западен Балкан.

  • 16x9 Image

    Горица Попова

    Родена е во Кочани, дипломирала во 1976 год. на Филозофскиот факултет во Скопје. Како новинар работи над 30 години. Почнала во Македонско радио- Радио Скопје во 1978 год. Од јуни 2009 год. е соработник на Радио Слободна Европа.

XS
SM
MD
LG