Своевремено признат како демократски реформатор, Додик го надгледуваше одржувањето на референдумот во септември лани за одбележување на 9 јануари како ден на Република Српска.
Тоа и покрај забраната на Уставниот суд на Босна и Херцеговина дека таквото одбележување преставува дискриминација за несрпското население во БиХ.
Американските претставници го оценија референдумот како кршење на законите и како обид за поткопување на мировните договори.
Американската амбасадорка во БиХ Морин Кормак потврди синоќа дека САД воведоа санкции против Додик поради опструкции на Дејтонскиот договор.
„Милорад Додик му се спротивстави на Уставниот суд на БиХ, го прекрши законот и претставува значителна закана во врска со спречувањето на спроведувањето на Дејтонската спогодба“, рече таа.
Соединетите Држави и Европската унија беа против референдумот за Денот на Република Српска.
Гласањето беше поздравено од Русија со која Додик заговара потесни врски.
Шефот на руската дипломатија Сергеј Лавров вчера изјави дека граѓаните на БиХ сами треба ја решаваат нивната иднина.
Додик е за независност на Република Српска и се закани дека ќе одржи референдум за статусот на судскиот ситем како и за повлекување на војниците на Република Српска од заедничката босанска армија.
Санкциите подразбираат забрана на патување во САД и замрзнување на имотот на територијата на САД, како и во сите земји кои ќе им се придружат на овие санкции.
До оваа мерка доаѓа неколку недели откако Додик соопшти дека бил поканет на инаугирацијата на избраниот американски претседател Доналд Трамп на 20 јануари во Вашингтон, но оти американската амбасада во Сараево одбила да му даде дипломатска виза.
Како што се испостави, поканата била за приватен бал спонзориран од верски и конзервативни организации. Додик најави дека ќе бара регуларна американска виза.
