Достапни линкови

Македонците докажаа дека заслужуваат сопствена држава


Македонскиот народ без војна се осамостои од Југославија и во изминативе 23 години покажа дека заслужува своја сопствена држава, и покрај сомнежите на дел од меѓународната јавност во раните деведесетти.

Македонскиот народ без војна се осамостои од Југославија и во изминативе 23 години покажа дека заслужува своја сопствена држава, и покрај сомнежите на дел од меѓународната јавност во раните деведесетти, и тоа е најголемиот успех од осамостојувањето, но се чини дека го губиме фокусот од стратешките определби зацртани уште од самиот почеток на државноста во 1991 година, велат нашите соговорници и високи политички функционери во периодот на осамостојувањето Стојан Андов и Денко Малески.

Тоа е таа наша голема слабост што не можевме да исчекориме и да кажеме дека без алтернатива ние развиваме пријателски односи и нашите пријателства се ориентирани кон земјите од НАТО и ЕУ.
Стојан Андов, прв претседател на Собранието во независна Македонија.

Првиот претседател на Собранието во самостојна Македонија, Стојан Андов, вели дека најголемите маани во изминативе 23 години се популизмот и скептичноста во ориентацијата на земјава кон НАТО и ЕУ.

„Тоа е таа наша голема слабост што не можевме да исчекориме и да кажеме дека без алтернатива ние развиваме пријателски односи и нашите пријателства се ориентирани кон земјите од НАТО и ЕУ. Секогаш во воздухот овде лебдело некое мислење дека ние имаме и други алтернативи што е голема грешка“, вели Андов.

Иако устата им е полна со тоа дека ние сме за НАТО и ЕУ, меѓутоа не се спремни да направат жртва која е неопходна за тоа и така се вртиме во тој круг 23 години, се вртиме околу овие стратешки цели, НАТО и ЕУ.
Денко Малески, прв министер за надворешни работи во независна Македонија.

Првиот министер за надворешни работи во самостојна Македонија, универзитетскиот професор Денко Малески, вели дека двата главни проблеми кои се провлекуваат во изминатите две децении се демократијата и односите со соседите. Без демократија, без слобода и правда, нема да има што да нè обединува, вели тој.

„На почетокот од независноста не разбравме дека и другите етнички заедници имаат големи очекувања од бранот на слободата кој ја заплисна Источна Европа и со првиот Устав си правевме држава по наш, македонски терк за десет години подоцна тоа да ни се удри од глава во една друга констелација на односи и тука нешто научивме. Сега повторно имаме проблеми со демократијата кои мора да ги надминеме за опстане овој наш македонски мозаик“, вели Малески.

Тој посочува дека вториот голем предизвик е подобрување на односите со соседите и оти тоа е колосална задача. Малески вели дека фокусот во стратешките интереси на Македонија е изгубен во борбата за опстанување на власт.

„Иако устата им е полна со тоа дека ние сме за НАТО и ЕУ, меѓутоа не се спремни да направат жртва која е неопходна за тоа и така се вртиме во тој круг 23 години, се вртиме околу овие стратешки цели, НАТО и ЕУ“, вели Малески.

  • 16x9 Image

    Срѓан Стојанчов

    Новинарската кариера ја започна како новинар во внатрешно-политичката рубрика на дневниот весник Шпиц во 2008 година. Роден е на 27.10.1981г. во Скопје. Од февруари 2009 работи како постојан дописник за Радио Слободна Европа од Скопје.

Ваше мислење

Покажи ги коментарите

XS
SM
MD
LG