Достапни линкови

Прославата на Денот на независноста 8 Септември, најкоментирана тема од слушателите на нашата веб-страницата.

Прославата на Денот на независноста 8 Септември е тема што најмногу ве испровоцирала да ги испратите своите коментари на нашата веб-страница, почитувани, а ние во наредните две и пол минути ќе ги препрочитаме оние највпечатливите, според нашиот избор, се разбира.
Проектот Скопје 2014 забрзано се довршува во пресрет на прославата на 20-годишнината од прогласувањето на независноста.

Глигорче од Скопје пишува дека предвидената парада и забавната програма биле во ред, само се прашува како ќе се одвива парадата на овие горештини, и што ќе правеле учесниците со по 600 денари дневница. Да се каже вистината, другите ваши пораки се забелешки на правописот и на лекторирањето на текстот „Независноста ќе се слави цел септември“. Но во исто време, Горан му забележува на слушателот потпишан со Г-дин Лектор што забележува за правописот, но тоа го пишува на латиница.
Како ќе се одвива парадата на овие горештини, и што ќе правеле учесниците со по 600 денари дневница?!
„Глигорче од Скопје“.

Драган од Кина, откако го прочитал текстот „Грандиозна прослава за самостојноста“ ни забележува дека сме правеле контрапропаганда против Македонија и дека баш требало да има парада, песна за Македонија и споменик и на Александар и на кој било друг. Не можеме ние Македонците да израснеме од комплексот на ниска вредност - пишува Драган, додека не се прифатиме какви што сме, без разлика на антика или Словени, Македонците се Македонци и тоа ќе останат - извикува Драган од Кина.
Триумфалната капија или официјално „Порта Македонија“ се привршува.

Димче Дамевски - Смилево 1903 Даме Груев (ова му е редовниот потпис на коментарите) како и секогаш во своите огромни коментари ги повторува жалопојките за судбината на Македонците и ги обвинува сите во светот за таа судбина. Едно нешто што заслужува внимание од пораката е дека Димче реагира зошто се намалува бројката на зраците на 16-кракото Сонце по спомениците во Скопје и вели дека тоа е понижувачки и поништувачки чин.
Не можеме ние Македонците да израснеме од комплексот на ниска вредност, додека не се прифатиме какви што сме, без разлика на антика или Словени, Македонците се Македонци и тоа ќе останат.
„Драган од Кина“.

Петер, претпоставувам дека е грешка, па тоа е Петар, од Абу Даби смета дека не ни требаат споменици туку ни треба свест да сме се разбуделе од долгиот зимски сон што трае веќе 20 години и дека македонскиот народ требало да ги следи стапките на арапскиот свет и да ги преземе проблемите во свои раце, зашто изгледа немаме, како што пишува, свесна и сериозна политичка партија која може земјата да ја води во подобро утре. За споменикот на Александар порачува, претпоставувам до Владата, да се ослободела од расипаните илузии и да престане да го малтретира македонскиот народ.

И како за крај, малку економија: Дека септември ќе биде кризен месец, потврдува и пораката на Бојан од Скопје кој пишува дека трошоците за набавка на основните продукти се се' поголеми, а ќесето на едно просечно семејство се' попразно. Особено по летните одмори за кои смета дека ако некој нема пари не треба да оди по одмори, а не да се земаат кредити за да не се смееле комшиите дека немате пари. Ц,ц,ц, пусто Македонче, ја завршува својата иронична порака Бојан.
  • 16x9 Image

    Горица Попова

    Родена е во Кочани, дипломирала во 1976 год. на Филозофскиот факултет во Скопје. Како новинар работи над 30 години. Почнала во Македонско радио- Радио Скопје во 1978 год. Од јуни 2009 год. е соработник на Радио Слободна Европа.

Ваше мислење

Покажи ги коментарите

XS
SM
MD
LG