Достапни линкови

Слаби изгледи за влада во Бугарија откако ГЕРБ победи на изборите


Бугарија - пребројување на гласовите од парламентарните избори во Бугарија. 02.10.2022

Партијата ГЕРБ на бугарскиот екс-премиер Бојко Борисов тесно победи на вчерашните избори, четврти за помалку од две години во таа земја. Гласачите гледаат во Борисов ветување за стабилност и дипломатска зрелост.

Резултатите од 99 насто преброени гласачки ливчиња на 3 октомври покажаа дека ГЕРБ освоила 25,4 отсто од гласовите, додека центристичката партија „Продолжуваме со промените“ на поранешниот премиер Кирил Петков е втора, со 20,2 насто на четвртите избори во најсиромашната земја членка за помалку од две години Европската унија.

Трета политичка сила е националистичката „Преродба“ на Костадин Костадинов со 11,06 насто.

Бојко Борисов победник, но тешко до нова влада во Бугарија
please wait

No media source currently available

0:00 0:01:58 0:00

„Има таков народ“ на Слави Трифонов доби 3,83 насто поддршка и не го прескокнува потребниот праг за влез во 48-то Народно собрание на Бугарија.

Конечните официјални резултати со кои ќе се пресметаат и гласачките ливчиња од странство се очекуваат на 5 октомври.

Излезноста на гласачите е проценета на околу 30 насто.

Ваквите резултати се најава за тешки коалициски разговори кои повторно би можеле да завршат со слаб парламент или дури и со други избори.

Копретседателот на „Продолжуваме со промената“ Кирил Петков изјави дека нема да коалицираат со ГЕРБ, како и со Движењето за права и слободи.

Асен Василев, копретседател на партијата ја честиташе победата на ГЕРБ-СДС и го призна поразот, велејќи дека тоа е избор на бугарскиот народ. ГЕРБ, според Василев, треба да ја преземе својата политичка одговорност.

„Продолжуваме со промената“ ќе биде опозиција на оние кои победија на изборите во Бугарија, користејќи ги парламентарните можности“, рече тој.

Тоа ќе ја продолжи политичката нестабилност и ќе ја зголеми можноста Софија да го пропушти целниот датум за влез во еврозоната во 2024 година.

Бугарија формира координативен центар за санкции против Русија

Многу од политичките противници на Борисов го обвинуваат дека дозволил да се шири корупцијата за време на неговото децениско владеење кое заврши минатата година, комплицирајќи ги напорите за составување на функционално мнозинство.

Но, за некои гласачи во најсиромашната земја-членка на Европската унија, Борисов дава ветување за стабилност и дипломатска зрелост потребни за навигација во сложените односи на Бугарија со Русија.

Некогаш клучниот сојузник на Москва во ЕУ, Софија се оддалечи по руската инвазија врз Украина во февруари, со што стана првата членка на ЕУ заедно со Полска, антируски јастреб, на која Гаспром ѝ го прекина снабдувањето со гас.

За време на кампањата, Борисов изгледаше внимателно, велејќи дека ќе ја следи линијата на ЕУ и НАТО спрема Русија, но исто така испрати сигнал до прорускиот електорат дека ќе може да ги обнови односите откако ќе заврши војната.

„Има војна во светот... Важно е земјата да остане на својот евроатлантски курс“, рече тој по гласањето. Петков, 42-годишен дипломец на Харвард, кој одби да владее со Борисов, вчера изјави дека Бугарите избираат помеѓу политиката на транзицискиот период кој беше нарушен со ендемска корупција и потранспарентна Бугарија која ќе биде доверлива членка на ЕУ.

Радев - На Бугарија ѝ треба стабилна влада

Аналитичарите велат дека политичките партии, свесни за економските ризици од војната во Украина, претстои тешка зима и фрустрацијата на гласачите од политичката нестабилност, би можеле да ги остават своите разлики и да се одлучат за технократска влада.

„Многу Бугари очекуваат дека ќе се направат компромиси и сакаат да видат влада. Нема да биде лесно, но тоа е она за што служат политичарите“, вели Борјана Димитрова, од Алфа Рисрч, по објавувањето на излезните анкети.

  • 16x9 Image

    Гоце Атанасов

    Со новинарство започна да се занимава за време на студиите по новинарство во Скопје. Работел во Млад борец, Нова Македонија, Македонската радио телевизија, А1 телевизијата и во Дојче Веле, а во Радио Слободна Европа е од започнувањето на емитувањето на македонски јазик.

XS
SM
MD
LG