Достапни линкови

Романската православна црква прoтив промени во крштевањето по смртта на едно бебе


Влијателната Романска православна црква се спротивстави на повиците за реформа на церемонијата за крштевање, илустрација

Смртта на шестнеделно бебе за време на церемонијата на крштевање предизвика негодување кај јавноста во Романија и доведе до повици за промена на ритуалот. Ужасниот настан дава слика на поделбите во современа Романија. Текст на Алисон Мутлер

Смртта на шестнеделно новороденче откако беше потопено додека се крштева, предизвика гнев кај јавноста во Романија и доведе до барања за промена на вековниот обред.

Драмата на трагичниот настан е главна вест во Романија со недели. Влијателната Романска православна црква се спротивстави на повиците за реформа на церемонијата и остана доследна на своите корени, спротивставувајќи се на оние во Романија кои бараат некои црковни традиции да бидат изменети или модернизирани како што направија другите христијански цркви во последните децении.

На 31 јануари, бебето Јустин добило срцев удар кратко време откако беше крстено од православен свештеник во североисточниот град Сучеава. Следниот ден починало во болницата. Лекарите пронашле вода во неговите бели дробови.

Резултатот од обдукцијата се очекува за неколку недели, вели адвокатот на родителите на Јустин, Јоан Булбоака. Тој додаде дека свештеникот, докторот за итни случаи, родителите и гостите на крштевањето биле распрашани од обвинителите.

Романската православна црква повикува на молитви за дожд

Свештеникот кој го извршил крштевањето, Александру Мазараче, е осомничен во истрагата за смртта на Јустин. Адвокатот на Мазараче, Марсел Балатчи, за РСЕ на 11 февруари изјави дека неговиот клиент „е невин“ и рече дека тој „го извршил ритуалот според црковните канони“.

Како резултат на смртта на Јустин, десетици илјади потпишаа петиција против три целосни потопувања во вода неопходни за крштевање во Православната црква.

Во невиден чекор, правобранителот на Романија се состана со црковните свештеници на 17 февруари и препорача некои здравствени и безбедносни мерки - вклучително и подобра обука за крштевки. Тој побара црквата да ги крсти бебињата кога тие се малку постари.

Светиот синод

Но, притисокот на јавноста не ја поколеба црквата, барем во суштинското прашање на крштевањето - ритуал што означува прием во христијанството и се смета за света тајна.

Светиот синод на Романската православна црква се состана на 25 февруари и објави дека ритуалот на крштевање нема да биде изменет. Но, додаде дека Синодот ќе ги поттикне свештениците да бидат поодговорни при извршувањето на ритуалот.

Синодот исто така пресуди дека свештениците ќе треба да се состанат со родителите пред крштевањето и да разговараат за здравјето на нивните деца, додека теолошките училишта ќе обезбедат „зголемено внимание“ на предавањето на идните свештеници за практиката на потопување.

„Овие канони поврзани со верата важат повеќе од 1.000 години - затоа нема да се промениме“, вели Архиепископот Теодосие.
„Овие канони поврзани со верата важат повеќе од 1.000 години - затоа нема да се промениме“, вели Архиепископот Теодосие.

Архиепископот Теодоси, водач на конзервативното крило на црквата, кој беше критикуван во јавноста заради неисполнување на правилата за заклучување на коронавирусот, по кратко време по смртта на доенчето, посочи дека црквата нема да се поклони пред бесот на јавноста.

„Нема да бидеме исплашени. Овие канони поврзани со верата важат повеќе од 1.000 години - затоа нема да се промениме“, рече тој. Владимир Думитру, наставник по биологија од источниот град Мацин и автор на петицијата за промена на ритуалот на крштевањето, за РСЕ изјави дека отстапките направени од синодот се „мал чекор напред, но не е вистински“.

Тој рече дека ќе иницира друга петиција и ќе ја испрати до парламентот со барање од властите да извршат медицинска проценка за да утврдат кои ризици постојат во православните крштевки.

Византиски времиња

Многу набљудувачи не беа изненадени од одговорот на црквата на повикот за промени што можат да ја подобрат безбедноста на доенчињата за време на крштевањето.

Викторија Кларк, авторка на книгата „Зошто паѓаат ангелите“, книга за источно православие од 2000 година, за РСЕ рече дека „толку многу од верата во Православната црква се заснова врз нејзината непроменлива, вечна природа и дека можете да пронајдете ритуали сè до Византиското време“.

Православието против модерното


„Ако ги изгубите овие непроменливи ритуали, ќе изгубите нешто што е интегрално во верата… или како што на ист начин магионичарот има потреба да изведе трик прецизно, инаку не е ефикасен“, рече таа за РСЕ.

Крштевањето на Исус на Јован Крстител во Јордан во првиот век е основниот настан врз кој се заснова долгогодишната традиција. Крштевањето се извршува буквално во секоја христијанска црква, иако Православната црква и протестантските баптисти се најмногу познати по целосното потопување на децата при крштевањето.

Повеќето римокатолици, лутерани и мнозинството други протестантски цркви вршат попрскување или истурање вода врз главата на некој што се крсти, не претставувајќи никаква опасност за новокрстениот.

Јавна критика

Повеќе од 85 проценти од Романците ѝ припаѓаат на Православната црква, иако многу православни ја доведуваат во прашање влијателната улога на црквата во општеството.

Некои, исто така, се против часовите по религија во училиштата, за кои велат дека се фокусираат врз Православната црква, со исклучок на другите конфесии и вери. Други велат дека црквата неправедно има корист од државното финансирање.

Демонстранти против обредот на крштевањето на Православната црква на Романија, Букурешт, февруари 2021.
Демонстранти против обредот на крштевањето на Православната црква на Романија, Букурешт, февруари 2021.

Но, смртта на Јустин за време на неговото крштевање доведе до нови критики во врска со целосната постапка на потопување за време на ритуалот. Петицијата на Думитру со која се повикува на „умерен и конструктивен“ пристап кон крштевањето беше потпишана од повеќе од 65.000 луѓе до 3 март.

Потписниците сакаат главата на детето да биде симболично попрскана со вода“, се вели во него.„Смртта на бебињата предизвикана од ваквите практики, дури и ако е случајна, е трагедија која нема крај, која носи тага наместо радост. Овој ризик треба да се отстрани во иднина “, се вели во петицијата.

Крштевањето „неспорно“

Портпаролот на црквата Василе Банеску на 15 февруари изјави дека луѓето имаат право да потпишат петиција, но „начинот на кој се спроведува религиозен ритуал исклучиво зависи од огромната индивидуална одговорноста на црковниот свештеник“.

„За крштевањето не може да се преговара“, отворено рече архиепископот Теодоси во интервју за Радио Доброгеа, додавајќи: . „Тоа е дело на Бога. Дали ќе го исправиме Бог?“ Кристијан Парвулеску, декан на Националното училиште за политички студии и јавна администрација, предвиде пред состанокот на синодот дека црквата нема да го менува ритуалот.

„Црквата не прифаќа католички практики“, рече тој за РСЕ на 18 февруари. „Ова би значело предавање на јавното мислење и тие не се подготвени да го сторат тоа“. Тој рече дека вистинскиот ритуал е „извонредна траума за детето ... траума која никогаш не била испитана и веројатно е причина за многу проблеми во нашето општество“.

Промена од внатре

Се чини дека постои одредена отвореност за изменување на ритуалот на врвните нивоа на црквата. Архиепископот Аргес, Калиниќ, член на Светиот синод, рече дека поддржува понежна форма на крштевање „за да се избегнат несакани несреќи“. Тој е првиот постар свештеник кој нуди помалку круто толкување на церемонијата.

Романскиот парламент избра проевропска централно-десничарска влада

Архиепископ од 2009 година, Калиниќ во јануари ја крсти ќерката на Николај од Романија, внук на починатиот крал Михаил и рече дека тој ги натопил нозете во вода и ѝ налеал вода на челото, церемонија слична на оние што се изведуваа во не-православените христијанин цркви.

Непроменлив ритуал

Дан Сиашир, коментатор на православните работи и црковен бранител, објасни дека крштевањето е едно од седумте тајни и има суштинско значење во христијанскиот живот. „Идејата е за личноста крстете се пред да умрете.

Имало милиони православни крштевки како ова, а понекогаш има и трагични инциденти, но не можете да го промените ритуалот“. Тој рече дека свештениците се учат како да го држат бебето на теолошка обука, користејќи кукли наместо вистински доенчиња.

Семејна трагедија

За семејството, смртта ја надминува непосредната лична трагедија. Таткото на новороденчето, Александру Унгуреану, за РСЕ изјави дека ритуалот на крштевање „требаше да се промени одамна“, велејќи дека имало сличен случај во североисточниот град Јаси во 2017 година, кој не доби големо внимание од медиумите.


Додека православниот обред на крштевање засега останува непроменет, многумина веруваат дека спорот со црквата не е завршен. „Отворена е кутија во Пандора“, рече Думитру на 28 февруари. „Кога има друг [трагичен случај што резултира со смрт], како што сум убеден дека за жал ќе има, ќе има навистина, навистина грда реакција од општеството“.

  • 16x9 Image

    Гоце Атанасов

    Со новинарство започна да се занимава за време на студиите по новинарство во Скопје. Работел во Млад борец, Нова Македонија, Македонската радио телевизија, А1 телевизијата и во Дојче Веле, а во Радио Слободна Европа е од започнувањето на емитувањето на македонски јазик.

XS
SM
MD
LG