Достапни линкови

Евентуалниот компромис со Бугарија во две насоки


Премиерот Зоран Заев се сретна со португалскиот министер за надворешни работи Аугусто Сантош Силва (Л) и еврокомесарот за проширување Оливер Вархеји (Д) во Скопје на 21 мај 2021
Премиерот Зоран Заев се сретна со португалскиот министер за надворешни работи Аугусто Сантош Силва (Л) и еврокомесарот за проширување Оливер Вархеји (Д) во Скопје на 21 мај 2021

Вицепремиерот Никола Димитров вели дека компромисот со Бугариja има две страни, едната е двете страни да се договарат да не се договорат за сè и другата - заедничките интереси.

Една недела од кога еврокомесарот за проширување Оливер Вархеји и министерот за надворешни работи на Португалија Аугусто Сантош Силва го донесе своето предлог решение на спорот меѓу Скопје и Софија со кое би требало Бугарија да ги деблокира македонските европски интеграции, атмосферата во двата главни града се чини сменета. И од македонската и од бугарската влада се слушаат пораки за можен напредок во процесот, а бугарскиот претседател Румен Радев ја спомена и можноста за деблокада на европскиот процес уште на самитот на ЕУ во јуни.

Засега македонските власти се воздржани околу содржината на донесениот предлог, освен изјавите дека го сметаат за добра основа за преговори и дека со него се зачувани македонските идентитетски одредници.

Вицепремиерот за евроинтеграции Никола Димитров, еден од соработниците со кои премиерот Зоран Заев најави дека одблиску ќе го разгледа предлогот на Вархеји и Силва вели дека сегашниот компромис има две страни.

Димитров: Компромисот со Бугарија има две страни
please wait

No media source currently available

0:00 0:03:13 0:00
Директен линк

„Сегашниот компромис, се извинувам не можам во детали оти е во деликтна фаза процесот, треба да се даде шанса во дипломатските преговори, разговори и контакти, меѓутоа, на крупно, компромисот има две страни- една страна, кога на некој начин се договараме да не се договориме за се. Бугарската страна си има свои позиции, македонската страна си има свои позиции. Вториот дел од копромисот е таму каде што очигледно имаме заеднички интерес да направиме се што можеме да имаме конкретен патоказ, со рокови, со надлежни институции, да го спроведеме Договорот за пријателство“, вели Димитров во интервју за Радио Слободна Европа кое во целост ќе го емитуваме в недела.

Бугарската агенција БГНЕС минатата недела, само што стигна предлогот во Софија, повикувајќи се на свои извори тврдеше дека португалското претседателство предвидува да има еднострани декларации на Бугарија и Република Северна Македонија, односно конкретно се предлага „РСМ да признае дека македонскиот јазик е кодифициран во 1945 година“, но тоа, како што пишуваат е одамна признат факт од властите во Скопје. Понатаму, се предлага двете држави да разменат декларации за краткото и долгото име на РСМ, а како апсолутен преседан агенцијата го оценува тоа што во предлогот се зборува за црвените линии на РСМ.

Сега бугарската страна инсистира и на патоказ кој би го предложила Македонија, би ги содржел бугарските барања од Декларацијата на бугарското собрание од 2019 година и би бил под мониторинг на ЕУ.

Според Марко Трошановски од Институтот за демократија патоказот не би бил ограничувачки само ако не притиска со рокови и наметнува решенија.

„Патоказот може да биде и голема замка и да значи всушност, де факто и де јуре, прифаќање на дебатата што ја наметнува Бугарија за идентитетот и јазикот, теми кои се надвор од Договорот за добрососедство. Ако роковите и насоките во тој патоказ упатуваат и на таква дебата, тоа треба да биде црвената линија и тој да биде отфрлен“, вели Трошановски.

Вицепремиерот Димитров, пак, вели дека за идентитетските прашања на земјава не и треба признавање или непризнавање и дека ако Бугарија сака да има некакво дообјаснување за себе, како бугарска позиција, тогаш вели тоа може да биде дел од компромисот.

  • 16x9 Image

    Фросина Димеска

    Родена е 1980 година во Скопје. Со новинарство се занимава од 2004 година кога почнува да работи како постојан дописник на Радио Слободна Европа од Скопје.
    Во периодот од 2008 година до почетокот на 2014 година работи прво како новинар во телевизијата Алсат М а потоа во дневниот весник Нова Македонија.

XS
SM
MD
LG