Достапни линкови

Бајден vs Трамп: Која е разликата помеѓу двата случаи со доверливите документи?


Видео од американскиот претседател Џо Бајден додека поранешниот американски претседател Доналд Трамп зборува за време на митинг пред среднорочните избори, во Мајами, Флорида, САД, 6 ноември 2022 година

Документи со доверливи ознаки беа откриени и во домот на поранешниот американски потпретседател Мајк Пенс. Ова е најновото во низата откритија на доверливи информации во приватни резиденции. Претходно, тајни документи беа пронајдени и во домовите на претседателите Џо Бајден и Доналд Трамп.

Американскиот државен обвинител Мерик Гарланд назначи двајца различни специјални советници кои независно ќе го истражат ракувањето со доверливите записи од страна на републиканскиот поранешен претседател Доналд Трамп и неговиот демократски наследник, претседателот Џо Бајден.

Џек Смит, обвинител за воени злосторства, истражува дали Трамп или неговите соработници неправилно ги задржале доверливите досиеја во неговиот имот на Флорида откако тој ја напушти функцијата во 2021 година, а потоа се обидел да ја попречи федералната истрага.

Гарланд го назначи поранешниот американски обвинител Роберт Хур од времето на Трамп за Мериленд за да го истражи отстранувањето и задржувањето на доверливите записи од времето на Бајден како потпретседател, и нивното откривање во неговиот дом и неговата тинк-тенк канцеларија.

Кои се сличностите помеѓу двата случаи?

Ниту Трамп, ниту Бајден не треба да поседуваат доверливи материјали. За време на претседателскиот преоден период, записите од секоја администрација треба да бидат предадени на легално чување на Националниот архив на САД.

Незаконски е свесно или намерно отстранување или задржување на класифицирани материјали.

Неуспехот правилно да се складира и обезбеди доверливиот материјал претставува ризик за националната безбедност доколку тој падне во погрешни раце.

Бајден рече дека бил изненаден кога дознал дека поседува доверливи информации.

Трамп на социјалните мрежи, без да обезбеди докази, рече дека ги декласифицирал досиејата, иако неговите адвокати одбија да го повторат тоа тврдење во судските поднесоци.

ФБИ барале документи за нуклеарно оружје во имотот на Трамп

Материјалите за кои станува збор датираат од времето кога Бајден беше потпретседател на претседателот Барак Обама од 2009 до 2017 година, и кога Трамп беше претседател од 2017 до 2021 година.

Како се разликуваат двата случаи?

Правните експерти велат дека постојат остри контрасти меѓу двата случаи. Во случајот на Трамп, Националниот архив се обидуваше повеќе од една година откако Трамп ја напушти функцијата да ги врати сите записи што ги задржа, но без успех.

Кога Трамп конечно врати 15 кутии со документи во јануари 2022 година, службениците на Архивата открија дека тие содржеле доверливи материјали.

Работата беше упатена до Одделот за правда, кој издаде покана за големата порота минатиот мај барајќи враќање на сите доверливи записи. Инспекторите потоа го посетија домот на Трамп, каде што неговите адвокати предадоа повеќе материјали и тврдеа дека нема повеќе документи во просториите. Тоа се покажа дека е лажно.

Дополнителните докази собрани од ФБИ, вклучително и снимките од надзорот од имотот Мар-а-Лаго, ги поттикнаа агентите да побараат судско одобрение за извршување на налог за претрес на 8 август поради загриженоста за можна опструкција. ФБИ откри дополнителни 13.000 документи, од кои околу 100 беа означени како доверливи.

Во случајот на Бајден, Гарланд рече дека адвокатите на претседателот ги информирале Архивите и Министерството за правда во ноември дека откриле помалку од десетина доверливи досиеја во плакарот во тинк-тенк центарот Пен Бајден во Вашингтон претходно истиот месец.

По откритието, адвокатите продолжија да вршат дополнителни претреси во домовите на Бајден во Вилмингтон и Рехобот Бич, Делавер, каде што беа пронајдени повеќе документи и во декември и овој месец. Сите им се предадени на властите.

Со која правна опасност се соочуваат Бајден и Tрамп?

Тоа е кривично дело само ако задржувањето и отстранувањето на класифицирани записи е намерно.

Обвинителите обично нема да покренат обвиненија за случајно задржување на доверливите записи, но ако има докази за можно попречување на правдата, тоа би можело да ги промени работите.

Од таа причина, велат правните експерти, Трамп се соочува со значително поголема правна опасност од Бајден.

Побарано сведочење од Трамп и неговите деца поради „значајни докази“ за измама

До денес, нема сугестија од Министерството за правда дека Бајден свесно ги задржал досиејата или одбил да ги врати на владата. Исто така, како претседател, Бајден веројатно нема да се соочи со кривично гонење.

Министерството за правда не ја промени својата долгогодишна политика дека актуелниот претседател не може да биде обвинет.

Истата политика помогна да се изолира Трамп кога беше претседател и под истрага од тогашниот специјален советник Роберт Мулер.

Во тој случај, Мулер одби да утврди дали Трамп ја попречил неговата истрага за можните врски меѓу Русија и предизборната кампања на Трамп во 2016 година поради политиката на Министерството.

  • 16x9 Image

    Гоце Атанасов

    Со новинарство започна да се занимава за време на студиите по новинарство во Скопје. Работел во Млад борец, Нова Македонија, Македонската радио телевизија, А1 телевизијата и во Дојче Веле, а во Радио Слободна Европа е од започнувањето на емитувањето на македонски јазик.

XS
SM
MD
LG